"Sulat ng Isang Anak"

"Sulat ng Isang Anak"

Ella Marie L. Mandane

(Spoken word poetry winner, Buwan ng Wika)

Grade 12

Ikaw yung liwanag ng buhay ko,

Buhay na hindi mo ipinagkait para sa tulad kong paslit.

Paslit na iyong dinala ng siyam na buwan, paslit na hindi mo pinabayaan.

Paslit na sabi mo, biyaya ng Maykapal na tatawagin mong anak.

Hindi alintana ang sakit, kirot at paghihirap

Masilayan lamang ang paslit na hinahangad.

Sa kabila ng matinis na pag-iyak, siya namang kagalakan ng isang babaeng pagod na pagod, hingal na hingal at tila mala lantang gulay matapos akong iluwal.

Magmula sa iyong buong pag-iingat nang ako'y iyong dinadala

Sa sinapupunan na mala paraiso ko't palaruan habang ako'y sabik na ika'y masilayan.

Dumating na nga ang araw na hinihintay,

Ang araw kung saan iyong masisilayan ang paslit na biyaya ng Poong Maykapal

Ang araw kung saan magsisimula ang iyong responsibilidad

Sa sanggol na tatawagin kang nanay.

Naalala ko pa ang mga panahong ang gabi ay nagiging araw

Ang mga mata mong dilat na dilat

Para lang ipagtimpla ako ng gatas

Ang paghele sa tanghaling tapat

Para makatulog ako ng naaayon sa oras.

Batid ko ang lahat ng iyong paghihirap

Paghihirap upang ipamalas ang mga karapatan,

Paghihirap para makatungtong sa magandang paaralan

At magkaroon ako ng magandang kinabukasan.

Lumipas ang araw, ang buwan, at ang taon.

Maraming tanong ang nabuo sa aking isipan.

Mga tanong na ni minsan hindi ko mabigyan ng kasagutan.

Mga tanong na hanggang ngayon patuloy kong inaalam ang dahilan.

Diskriminasyon sa loob ng tahanan aking nararanasan

Pagkukumpara mo sa akin at sa anak ng iyong pinsan.

Ma, kay sakit sa pakiramdam,

Kaysakit sa pakiramdam ng mga katagang iyong binibitawan.

Mga katagang iyong binabato ng walang pag-aalinlangan

Mga katagang hindi ko lubos na maunawaan kung paano mo ito binibitawan.

Mga katagang wari'y isang patalim na isasaksak sa akin para lang matauhan.

Naalala ko pa ang mga panahon na binitawan mo ang mga katagang iyon.

Mga katagang hindi ko malilimutan, tumatak na sa aking isipan at nailathala na sa aking karanasan.

Mga katagang "hindi ka karapat-dapat ipagmalaki bilang anak ko"

Mga katagang "wala kang kwentang ate sa mga kapatid mo"

Mga katagang "wala kang silbi at lumayas ka dito"

Hindi ako kumibo ng mga oras na iyon.

Pero ma, aaminin ko durog na durog ang puso ko sa mga katagang binitawan mo.

Ni minsan hindi mo ako pinakinggan

Mga kwentong tungkol sa paaralan wala kang pakealam.

Hindi mo alam kung ano ang aking nararamdaman

Tanging ang unan sa gabi ang sandayan

Mga kaibigan at guro sa paaralan ang aking takbuhan.

Mga masasakit na salitang hindi ko malimutan

Ginawa kong motibasyon para ipagpatuloy ang pagkamit ng tagumpay.

Gustuhin mang magtanim ng sama ng loob pero hindi ko magawa

Hindi ko magawa pagkat alam kong hindi tama.

Sa tuwing nagbibitaw ng masasakit na salita

Puso'y nababalot ng pangamba

Pangamba na kung ako pa nga ba ay may halaga.

Pero ma, gusto kong iparating sa iyo na sa kabila ng mga naranasan ko

Sa kabila ng mga katagang natanggap ko mula sa iyo

Hindi ko maipagkakait na hindi sapat ang salitang salamat

Sa lahat ng iyong sinakripisyo, sa lahat ng iyong paghihirap.

Ma, walang salita ang magsasabi kung gaano ko kaylangan ang iyong pagkalinga

Walang salita ang magsasabi kung gaano ko nais maramdaman muli ang iyong magiliw na pag-aaruga

Sapagkat alam ko, alam ko sa sarili ko na hindi matutumbasan ng kahit anong salapi, kahit anong pag-aari ang pagmamahal ng isang ina.

Walang isang salita ang makapagsasabi kung gaano ka kahalaga

Sa kabila ng mga natanggap kong masasakit na salita na hindi ko inakala

Walang isang salita ang makapagsasabi kung gaano ako pinagpala

Sapagkat meron akong ina, ina na wala ang iba, isang ina na hinahangad ng mga nangungulila.

Ma, sa kabila ng mga dinanas, sa kabila ng aking mga natanggap, sa kabila ng mga luhang pumatak

Ikaw pa rin talaga, ikaw pa rin ang nagpabatid ng tunay na pag-ibig.

Ikaw pa rin ang babaeng dakila sa anumang sulok ng daigdig

Ikaw pa rin ang huwaran at bayani na namumukod tangi at nag-iisa sa aking dibdib.

Spoken Word Poetry winner, Ms. Ella Marie L. Mandane of Grade 12 (Photo by SSG)